Жил бүрийн Сар шинийн баяраар иргэд хуулийн дагуу шинийн 1, 2, 3-ны өдрүүдэд бүх нийтээр амардаг. Энэ жилийн хувьд ч Сар шинийн баярын битүүний өдөр буюу хоёрдугаар сарын 8-ны даваа гараг, болон 12-ны баасан гарагт ердийн цагаар ажиллаж, хоёрдугаар сарын 9, 10, 11-ний өдрүүдэд амарна.

Дээрх өдрүүдэд хүйтний эрч суларч дулаахан байна. Гэхдээ шинийн гуравнаас эхлэн цаг агаар муудах тул үүсч болзошгүй эрсдлээс урдчилан сэргийлэхийг цаг уурын хүрээлэнгээс ард иргэдэд сэрэмжлүүллээ.

Цаг агаарын урьдчилсан төлөвөөр 8-9-нд нийт нутгаар хүйтний эрч эрс суларч баруун бүсэд -20-28 хэм орчим хүйтэн байна. Харин бусад нутгуудаар -1-10 хэм орчим хүйтэн байна. Гэхдээ 9-10-нд баруун болон төвийн аймгуудын хойд хэсгээр, 11-нд ихэнх нутгаар цас орж, салхи 7-12 м/с, Говийн бүсийн зарим нутгаар 16-18 м/с хүрч цасан шуурга шуурч, 10-нд нутгийн баруун хагаст, 11-нд нутгийн зүүн хагаст хүйтэрч цаашдаа 3-4 хоногтоо хүйтэн жавартай байх төлөвтэй.

УЦУОСМХ-гээс гаргасан мэдээгээр өнөөдрийн байдлаар 17 аймгийн 80 гаруй суманд зудтай байна. Түр зуурын энэ дулааралт удаан хугацаагаар үргэлжлэхгүй тул баяр болж байна гэж тайвширч болохгүй. Өнгөрсөн жилийн Цагаан сарын шинийн 1-нд баруун аймгуудын нутгаар, 2-нд нутгийн төв хэсгээр цас орж, цасан шуурга шуурч хүйтэрснээс зам даваа хаагдаж, халтиргаа гулгаа үүсэж хотоос гарч орох авто машины хөдөлгөөнийг хаах хүртэл арга хэмжээ авч байсан. Энэ жил ч мөн дээрх нөхцөл байдал давтагдах магадлал байгаа тул хөдөө явж байгаа зорчигч тээвэрчдийг цаг агаарын мэдээ сонсож, болгоомжтой явахыг анхааруулж байна.