Нийслэлийн ИТХ-ын ээлжит бус чуулган өчигдөр болох байсан ч хойшлуулав. Учир нь хотын дарга Э.Бат- Үүл Хятадын “Хуавей’’ компанийг санхүүжүүлэхээр “Аюулгүй хот” төслийг өргөн бариад байсан. Уг төслийн хүрээнд нийслэлийн томоохон 60 уулзварыг камержуулахаар тусгажээ.

 

Ингэхдээ Хятадын компанийг ямар ч тендергүйгээр сонгон Шалгаруулсан бөгөөд ажил гүйцэтгэх төсвийг нэг дахин нугалж оруулж иржээ. Энэ талаар нийслэлийн ИТХ дахь МАН-ын бүлгийн дарга Д.Амарбаясгалангаас зарим зүйлийг тодрууллаа.

 

-Нийслэлийн ээлжит бус чуулганыг ямар шалтгаанаар хойшлуулчихав?

 

-Нийслэлийн иргэдийн аюулгүй орчинд амьдрах нөхцөл боломжийг сайжруулах зорилгоор Засаг даргын зүгээс 5.5 сая ам.долларын өртөг бүхий 60 камерыг Улаанбаатар хотын хэмжээнд суурилуулах. Энэ ажлыг гүйцэтгүүлэхээр Хяталын “Хуавэй" группийг боломж нөхцөлийг хангана гэж үзэж байгаа юм билээ.

 

Гэтэл асуудлыг өргөн барьсан Засаг дарга тодорхойгүй шалтгаанаар өөрийнхөө өргөн барьсан асуудлыг буцаан татаж авсан. Гэтэл энэ хооронд нийслэлийн ИТХ-ын ажлын хороод хуралдсан. Ингээд судалж үзэхэд тухайн асуудал нь нэгдүгээрт, техник эдийн засгийн үндэслэлгүй. Хоёрдугаарт, Өрсөлдөөний тухай хуулийг зөрчсөн буюу ямар нэгэн байдлаар тендер зарлаагүй байсан.

 

Тодорхой нэг компанийг шууд сонгоод гэрээгээр ажил олгохоор төлөвлөсөн байсан. Тиймээс бид үүнийг багагүй шүүмжилсний үндсэн дээр татаж авлаа. Ямар шалтгаанар өргөн барьсан асуудлаа татаж авснаа хотын дарга тодорхой ярьсангүй л дээ.

 

-Нийслэлийг камержуулах санаачлага нь зөв ч эдийн засгийн хувьд боломжгүй төсөл гэж үзэж байгаа хэрэг үү?

 

-Манай цөөнхийн бүлгээс нийслэлийн иргэдийн аюулгүй, амгалан амьдрах нөхцөл боломжийг сайжруулах зорилгыг мэдээж дэмжиж байгаа. Гагцхүү энэ ажлын ард нь иймэрхүү ажлыг хэчнээн төгрөгийн төсөвт өртгөөр хийж байсан, одоо тооцоод үзэхээр хэчнээн төгрөгөөр хийж болохоор байна гэх мэт тооцоог мэргэжлийн хүмүүсээр гаргуулаад үзэхээр Э.Бат-Үүл даргын хэлээд байгаа шиг 5.5 сая ам.долларт хүрэхгүй байгаа юм. Бидний тооцооллоор бол үндсэндээ гурав орчим сая ам.долларт багтахаар байхад л бүтэн нугалаад оруулаад ирж байна шүү дээ. Эдийн засгийн хүндрэлтэй үед энэ бол байж боломгүй үйлдэл.

 

-Хэдийгээр том асуудал биш ч товлосон хурлыг хойшлуулснаар багагүй хэмжээний үргүй зардал гарна биз дээ?

 

-Өөрөө төсөл өргөн бариад, нийслэлийн ИТХ- ыг зарлачихсан. Энэ хооронд ИТХ-ын үйл ажиллагааг явуулаад татвар төлөгчдийн мөнгөөс багагүй хэмжээнийхийг гаргачихлаа шүү дээ. Жишээ нь өнөөдөр / өчигдөр/ л гэхэд хурал зохион байгуулахтай холбогдуулаад хоол унднаас авахуулаад бичиг цаасны гэх мэт багагүй хэмжээний зардал гаргасан. Гэтэл энэ бүхнийг хийснийхээ дараа чуулганаа тарааж байгаа нь ИТХ-ын үйл ажиллагаа үндсэндээ хүүхдийн тоглоомын хэлбэрт шилжсэний илрэл. Бид дэгээрээ сар бүрийн сүүлийн долоо хоногийн пүрэв гаригт хуралдах ёстой.

 

Гэтэл он гарснаас хойш буюу өнгөрсөн нэг, хоёрдугаар сард чуулган болоогүй. Энэ хооронд ээлжит бус чуулган зарлаад хурлынхаа бэлтгэл ажлыг хангаад, зардал мөнгөө зарцуулаад явсны дараа Засаг дарга өөрийн өргөн барьсан асуудлаа татаж авч байгаа нь татвар төлөгчдийн мөнгийг үрэн тараж хийж байгаагийн илрэл.Мөн өргөн барьсан төсөл нь тооцоо судалгаагүй үндсэндээ бидний ярьж шүүмжилдэг мөрөөдлийн зүйл яваад байгаа нь үүгээр батлагдаж байна л даа.

 

-Хурал хойшлуулсны төлөө шүүмжилж байгаа нь утгагүй гэх төлөөлөгч байна лээ л?

 

-Сонгууль ойртсон учраас бидний энэ алхмыг улс төр хийж байна гэж ойлгож болохгүй. Хамгийн гол нь бид аливаа зүйлд бодитой хандаж, татвар төлөгчдийн мөнгийг хэмнэх чиглэлд үйл ажиллагаагаа зориулж байх

 

М.Өнөржаргал

Эх сурвалж: "Монголын үнэн" сонин