Монголчууд та бидний уламжлалт хоол “цуйванг” саяхнаас Японы дунд сургуулиудын өдрийн цайны цэсэнд багтаажээ.

Японы Хонсю арлын Тюбу тойргийн Шизуока мужийн Изунокуни хотын хоёр ч дунд сургууль өдрийн цайны цэсэндээ цуйванг оруулсан тухай izu-np.co.jp орон нутгийн сонин нийтэллээ. Хоёр сургуульд 700 орчим хүүхэд суралцдаг байна.

Изунокуни хотын захиргаанд Монгол бүсгүй мэргэжилтнээр ажилладаг. Хатагтай Хадбаатарын Саруултуяагийн санаачилгаар дунд сургуулиудын өдрийн цайны цэсийг төрөлжүүлж, монгол цуйван, төмсний нухаш нэмжээ.

“Монголчууд хүнсэндээ мах болон сүүн бүтээгдэхүүн өргөнөөр хэрэглэдэг, тиймээс соёл болон аж ахуй нь Япончуудаас ялгаатай” гэдгийг хүүхэд багачуудад тайлбарлажээ.

Цуйван анх удаа амталсан 1-р ангийн сурагчид Монгол хоолыг “амттай”, мөн “ер бусын” гэж тодорхойлсон байна.

Монгол цуйванг хүүхэд багачуудад долоо хоногийн нэг өдөрт нь өдрийн хоолонд өгөх юм байна.

Изунокуни хот нь Атамаи, Изу, Ито, Нумазу хот болон Каннами тосгонтой зэрэгцэн байрладаг.

Тус хотод “Токио-2020” зуны олимпийн наадмын бэлтгэл хангах Монголын жүдочдод зориулсан бэлтгэлийн төв байрлах юм.

Японы мэргэжлийн сүмо бөхөд Монгол тамирчид үнэмлэхүй амжилт үзүүлж байгааг Япончууд уламжлалт хоол, идээтэй холбон тайлбарлаж байна.

Эх сурвалж: asiarussia.ru