2017 оны 06 дугаар сарын 28-ны Лхагва гарагт Замын цагдаагийн албаны ЖШУХ дээр нийт 335 дуудлага, мэдээ мэдээлэл хүлээн авснаас, зам тээврийн ослын 265 дуудлага бүртгэгдсэн бөгөөд осол, хэргийн улмаас 9 хүн гэмтсэн. Үүнээс зам тээврийн осолд 12-14 насны 2 хүүхэд өртсөн. Ослын шалтгаан, хэлбэрээр нь авч үзвэл явган зорчигч мөргөж гэмтээсэн 6, автомашинтай мөргөлдсөн 8, үл хөдлөх зүйл мөргөсөн 1 осол тус тус бүртгэгдсэнийг ЗЦА шалгаж байна.

Энэ өдөр Цагдаагийн байгууллагаас гудамж замд хийсэн хяналт шалгалтаар согтууруулах ундааны зүйл хэрэглэсэн үедээ тээврийн хэрэгсэл жолоодсон нийт 39 жолоочийг илрүүлэн саатуулж ажиллаа.

Тухайлбал:

  1. Нарны гүүрийн баруун замд T.Prius-30 маркийн автомашин Honda маркийн мотоцикльтой мөргөлдөж жолооч 21 настай А гэмтсэн.

Орон нутагт:

  1. Архангай аймгийн Их Тамир сумын нутаг шороон замд Kia Bongo маркийн автомашины жолооч Б нь явган зорчигч 78 настай, эрэгтэй С-г мөргөж амь насыг нь хохироосон хэргүүдийг шалгаж байна.

    Сүүлийн жилүүдэд иргэд тэр дундаа залуучууд хоёр болон дөрвөн дугуйт мотоциклийг ихээр унаж хэрэглэх болсон. Зарим иргэдийн хувьд мопед, мотоциклийг тээврийн хэрэгсэл биш гэх буруу бодол ч байдаг. Гэтэл МУ-ын Замын хөдөлгөөний дүрэмд

  1. “Механикжсан тээврийн хэрэгсэл гэж мопедоос бусад хөдөлгүүрээр тоноглогдсон бүх төрлийн тээврийн хэрэгсэл,
  2. Мопед гэж 50 см3-ээс илүүгүй ажлын багтаамжтай хөдөлгүүр бүхий хоёр буюу гурван дугуйтай, техникийн хурд нь цагт 50 км-ээс ихгүй тээврийн хэрэгсэл,
  3. Мотоцикль гэж шаахайтай буюу шаахайгүй хоёр дугуйтай механикжсан тээврийн хэрэгсэл. Энд өөрийн жин нь 400 кг-аас хэтрэхгүй гурав буюу дөрвөн дугуйтай механикжсан тээврийн хэрэгсэл мөн хамаарна” гэж заасан байдаг.

Мөн мотоциклийг 18-аас дээш насны, “А” ангилалтай жолоодох эрхийн үнэмлэхтэй хүн жолоодож замын хөдөлгөөнд оролцох дүрэмтэй юм. Мотоцикльтой замын хөдөлгөөнд оролцогч нь хамгаалах малгай өмсөх, хамгаалах малгай өмсөөгүй зорчигч тээвэрлэхгүй байх үүрэгтэй бөгөөд зориулалтын гишгүүр, зорчигчийн барих бариул байхгүй болсон тохиолдолд тухайн тээврийн хэрэгслийг ашиглахыг хориглосон байдаг.

Улсын хэмжээнд 2017 он гарсаар эхний 5 сарын байдлаар мотоцикльтой холбогдсон осол нийт 44 бүртгэгдсэн бөгөөд үүнээс 12 нь нийслэлд, 32 нь орон нутагт үйлдэгдэж, ослын улмаас 12 хүний амь нас хохирч, 32 хүн ямар нэгэн байдлаар гэмтэж бэртсэн харамсалтай үзүүлэлт байна.

Иймд жолооч та мотоцикль жолоодохдоо дүрмээ баримтлан бусад хөдөлгөөнд оролцогчдыг хүндэтгэн замын хөдөлгөөндөө соёлтой оролцоорой.