Өнгөрсөн жилийн баяр наадмаар найм давснаар улсын гарди цол хүртээд байсан аймгийн хурц арслан Н.Өсөхбаяраас допингийн төрлийн бодис илэрсэн билээ.

Уг асуудлаар Н.Өсөхбаяр нь Монголын Олон Улсын ба Үндэсний Спортын Арбитрын Дэргэдэх Допингийн давж заалдах комисст хандсан юм. Тус хэргийн шүүх хурал энэ сарын 9-нд анх товлогдсон ч тодорхой шалтгааны улмаас хойшилж өчигдөр буюу 24-ны 14:00 цагаас эхэлсэн юм.

Гэхдээ шүүх хуралд оролцогч талуудын хүсэлтээр дахин хойшлуулав. Энэ удаад тавдугаар сарын 11-ны Даваа гарагийн 10:00 цаг хүртэл хойшлуулж байгааг мэдэгдлээ.

Н.Өсөхбаярын өргөдлийг өнгөрсөн нэгдүгээр сарын 13-нд арбитрын шүүх хүлээн авсан. Хүсэлт хүлээн авснаас хойш зургаан сарын дотор шийдвэрлэх ёстойг Монголын Хуульчдын холбооны Зөвлөлийн гишүүн, Монголын Олон улсын ба үндэсний Спортын арбитрын Ерөнхийлөгч Г.Батзаяа шүүх хурлын төгсгөлд онцоллоо. Тодруулбал долдугаар сарын 14-нөөс өмнө шийдэх шаардлагатайг тэр сануулав.