УИХ-ын гишүүн П.Сайнзориг Монгол Улсын Ерөнхий сайд Г.Занданшатарыг огцруулах саналыг гаргаж, гишүүдээс гарын үсэг цуглуулж байгаа талаараа мэдээлэл хийлээ.

Тэрээр, Монгол Улсын үндсэн хуулийг зөрчиж байгаа, парламентын засаглалд халдсан, эдийн засгийг доройтуулж, ард иргэдийг төөрөгдүүлж, нийгмийг эмх замбараагүй байдал руу түлхэж байгаа Г.Занданшатарыг Ерөнхий сайдын албан тушаалаас огцруулах хөндөж тавих гэж байна. Ерөнхий сайд Г.Занданшатар Засгийн газрынхаа 100 хоногт юу амжуулсан талаарх мэдээллийг өгсөн. Энэ мэдээлэл дээрээс нь эхлээд олон нийт анхаарал хандуулж эхэлсэн байх. 

3х3 сагсан бөмбөгийн эмэгтэй баг АНУ-ын баг болон хүчирхэг олон багийг хожиж дэлхийн аварга болсон. Шатар, бокс, математик, И-спортын баг дэлхийн аварга болсон. Энэ бол Засгийн газрын хийсэн агуу ажлын нэг байлаа гэсэн мэдэгдэл хийж олон нийтийг бухимдуулсан. 

Ялангуяа улс орны эдийн засгийн макро түвшний тоонууд нь бүгд худлаа. Би үүнийг баримттайгаар хэлмээр байна. Хүн албан тушаал, эрх мэдэлд үлдэх сонирхолтой, үүндээ улайрч болно. Гэхдээ олон нийтийг төөрөгдүүлж худлаа мэдээллээр хангаж болохгүй. 

2026 оны төсвийн тухай хуулийн төсөлд аудитын ерөнхий газраас өгсөн дүгнэлт байгаа. Parlament.mn руу ороод харж болно. Тус дүгнэлт дээр төлбөрийн тэнцэл 462.4 сая ам.доллар, урсгал данс 1 тэрбум 662.1 сая ам.доллароор алдагдалтай. Шууд хөрөнгө оруулалт 945 сая ам.доллароор алдагдалтай болж 40.6 хувиар буурсан нь эдийн засгийн өрсөлдөх чадвар сулрах, гадаад өрийн үйлчилгээний эргэн төлөлтөд хүндрэл үүсэх, тэнцлийн алдагдлыг гадаад өрөөр санхүүжүүлэх эрсдэл үүсэхээр байна гэсэн дүгнэлт гарсан. 

Би дандаа баримттай ярьдаг. Түүнээс сэтгэл хөдлөлөөр ярьдаггүй.