УИХ дахь АН-ын бүлгийн хурлаар хэлэлцсэн асуудлын талаар мэдээлэл хийж байна.
 
Энэ үеэр УИХ-ын гишүүн С.Цэнгүүн жилд 22 удаа буюу хамгийн олон удаа гадаад руу явсан гишүүдийн нэг болжээ. Улсын төсвөөр явсан уу, хувийн зардлаар гадаад руу явсан уу? гэж сэтгүүлч түүнээс тодруулав.

УИХ-ын гишүүн С.Цэнгүүн, Намайг хамгийн олон удаа гадаад томилолтоор явсан гэж сайтууд мэдээлсэн. Үүнтэй холбоотойгоор УИХ-ын Тамгын газраас тодруулга авсан. Би 13 удаа албан томилолтоор, дөрвөн удаа хувийн ажлаар, нийт 17 удаа гадаад руу явсан. 

Би өөрийн ажлын тайланг гурван сар тутамд фэйсбүүк хуудсандаа нийтэлдэг. Гадаад томилолтын тайланг фэйсбүүктээ тусад нь бас тавьсан.

Зарим сайтад намайг 22 удаа гадаад руу явсан гэж мэдээлсэн.  Ташаа мэдээлэл түгээх нь олон нийтэд хий хоосон бухимдал төрүүлэх сөрөг талтай учир ташаа мэдээллийг залруулах нь зүйтэй гэж үзэж байна. Манай улс ардчилсан улс учир шүүхэд хандахгүй.

Яагаад ташаа мэдээлэл гаргасныг нь сэтгүүлчдээс асуухад, "Таны талаар мэдээлэхэд хандалт өндөр байдаг. Тиймээс энэ мэдээллийг оруулсан" гэж хэлсэн гэв. 

Тэрбээр өмнө нь  "Миний хувьд гадаад дахь томилолт энэ жил нэлээн их байлаа. УИХ-ын тамгын газрын төсвийн зардлаар биш олон улсын байгууллагын урилгаар үйл ажиллагаануудад оролцож явсан. Хамгийн залуу гишүүнээр сонгогдсон учраас залуу эмэгтэй парламентчдын холбоо гэж байдаг. Мөн залуу улс төрийн манлайлагчдын хөтөлбөрүүд бий. Энэ хөтөлбөрүүдэд хамрагдаад явахад 15 улсын эмэгтэй парламентын гишүүд тухайн сэдэвт асуудлуудаар өөр өөр улсуудад  очиж ажилладаг. Дараа жил манай улсад ирэхээр би бас хүсэлтийг тавьсан байгаа. Маш олон гадаад томилолтуудын урилгууд байсан ч гэлээ би өөрөө очиж илтгэл тавихгүй, үг хэлэхгүй л бол тэр бүр хүлээн авч яваагүй" хэмээн томилолтынхоо талаар ярьж байсан билээ.