Сайд нарыг ногоон гэрлээр, бүх намууд дэмжээд шууд баталчихлаа. Харин эсрэг саналтай цөөхөн хүмүүсийн нэг нь та байлаа?

Би Сайдын суудал овооны хадаг шиг л боллоо гэж хэлсэн. Ерөнхий сайд хүн “Хэн ч сайд хийж болно” гэж ярьж байгаа нь өөрөө эмгэнэл юм. УИХ-д орж ирэхээр бүхнийг мэддэг, чаддаг болчихдог юм биш л дээ. Би 24 жил Төрийн ордонд суухдаа Эрүүл мэндийн салбарыг удирдаад, эмч хүн болчихоогүй. Мэргэжил гэдэг юмыг үгүйсгэж байгаа нь Монгол төрийн ер бусын үзэгдэл. Муу хэлээд байдаг социализмын үед салбартаа толгой цохидог мэргэжилтнүүдийг сайдын суудалд суулгадаг байсан юм. Тэдний мэдлэг чадварыг ашиглаж л шинэ цагийн Монгол Улс хөл дээрээ босож ирсэн юм.

Тунгалаг тамирын Эрдэнэ гээд хүн байдаг даа. Хэдийгээр мэргэжил боловсролгүй ч эх орноо гэсэн сэтгэлтэй. Нэг цүнх бариад өдөр шөнөгүй явдаг ийм хүмүүс Монгол Улсыг босгосон. Гэтэл одоо мэргэжилгүй дээр нь нэмээд сэтгэлгүй хүмүүсийг сайд болгож байна.

Монголын Улсын Засгийн газрын тэргүүн хүн мэргэжил гэдэг юмыг үгүйсгэж УИХ-ын гишүүн бүхнийг чадна гэж хэлж байгаатай би хэзээ ч санал нийлэхгүй. Ний нуугүй хэлэхэд энэ гэм согог манай намд ч халдварлаж байгаа.

Эрх баригч хүчин хүн бүрийг сайд болгох гэж зүтгээд байна уу даа. АН-д ч тэр, МАХН-д ч тэр сайд хийчихээр УИХ-ын гишүүн биш хүмүүс зөндөө л байгаа. Тэр хүмүүсээ доромжилж байна. Сайдын суудлыг кнопын манаач болгож байгаа нь энэ. Ч.Сайханбилэгийн засаг огцрох цагт нэг кноп авч амиа хоохойлж үлдэх гэсэн ийм явган заль нуугдаж байна.

Зүгээр нэг даргалагч, бүлэглэлд хамаарч байвал шагналын журмаар хэн ч хамаагүй сайд болдог ёс Монголд тогтлоо. Үүнийг зөвтгөх ёсгүй. 

Шагналын журмаар сайд болж байна гэж яриад байна. Ямар гавьяа байгуулсан учраас шагналд сайдын суудал аваад байгаа юм бэ?

Угаасаа шагнал болгож л сайдын суудал авч байгаа шүү дээ. Өршөөлийн хуулийг будилуулахад гол үүрэг гүйцэтгэсэн З.Баянсэлэнгэ Барилгын сайд, Ц.Оюунбаатар Шадар сайд болчихлоо. Өршөөлийн хуулийг будилуулаад, авлига хээл хахуулийн хэргийг хаацайлж, өөгшүүлж байна. Намынхаа удирдлагын өмнө гавьяа байгуулсан л байх даа. Энэ гавьяаг нь л үнэлж байгаа юм. Өөр ямар гавьяа байгуулсан юм?

Уг нь Өршөөлийн хуулиар бодоод байх зүйлгүй, хийгээд хэвшчихсэн зүйл. Анх удаа хэрэг үйлдсэн, болгоомжгүйгээс хэрэг хийсэн, жирэмсэн, ахмад хүмүүсийг өршөөж байна. 1000-1200 хүн л хамрагдах юм. Үүнийгээ зөв хийчихсэн л бол хэлээд байх зүйлгүй. 25 суудалтай МАН, эрх баригч АН Ерөнхийлөгчийн хоригийг хүлээж авахаа мэдэгдээд байхад юу горьдож завсарлага авч байгаа юм бол. Ард түмэндээ тусалъя, шударга ёс тогтооё гэсэн хайчив?

Энэ завсарлагаас болоод 1000-1200 хүн хууль бусаар хоригдож байна. Ээжтэйгээ, аавтайгаа, хүү охинтойгоо уулзах гээд цаг минут тоолоод хүлээгээд сууж байгаа үр хүүхэд, эцэг эхүүд байж байна. Ингэж садаа болж болохгүй. Өршөөлийн хуулийн гол зорилго нь ард түмэн биш ганц хүн гэдгийг энэ завсарлагаараа харуулж байна л даа. Хүйтэн сэрүүн цаг болж байна. Бүтэн сарын ажил хүлээж байна. Хэдэн мянган хоригдлын хувийн хэрэг уншина гэдэг амаргүй асуудал. Би өөрөө хоёр удаа уншсан хүн. 21 цагийн горимд шилжээд шөнө 3-хан цаг унтаад ажиллахад бүтэн сарын ажил болдог юм. 

Би Н.Батцэрэг, З.Баянсэлэнгэ хоёрт хэлсэн. Та нараас болоод 1000 хүн хоригдож байна. Мянга битгий хэл нэг хүний эрхэнд халдаж байгаа нь асуудал болдог юм гэж хэлсэн. Тэд нар хөдлөхгүй байна.

Танай нам давхар дээлний асуудал хөндсөн ч сайд нарыг дэмжээд баталчихлаа. Энэ удаагийн парламентын 76 гишүүний 30 нь сайдын суудалд суусан рекорд тогтоож байна. Сөрөг хүчин өөрсдийн байр суурь байхгүй, ер нь муу ажиллаад байна уу? МАН засагт хамтрах үедээ ч бас үр дүнгүй ажилласан гэгдэж байгаа?

Хөөгдөж гарахыг л үр дүн гэдэггүй юм бол өөр ямар үр дүн байхав. МАН засагт хамтраад холион бантан л болсон. Сөрөг хүчний нүүр царайгаа алдаж, олонх цөөнхтэй парламентын горим алдагдсан. Хуйвалдааны дундуур АН төрд харш, өөрсдөдөө ашигтай хэдэн шийдвэр гаргаад  МАН-ыг хөөлөө дөө. Өрийн таазыг нэмнэ гээд манайх дэмжсэн. Урт нэртэй хуулинд өөрчлөлт оруулж газар шороогоо ухаж, байгаль сүйдлэх гээд тэрийг нь шийдэж өглөө. Энэ хоёр шийдвэрийг гаргаад л МАН-ыг гаргасан ч яадаг юм гээд яриад эхэлсэн.

Би ардын намд харьяалагддаг ч Монголын төрд зүтгэж байгаа хүн. Ардын намын юм болгоныг би хаацайлж суух үүрэггүй. Эцсийн дүндээ Монголын төр, сонгогч ард иргэдийн өмнө л үүрэг хүлээсэн хүн. Ардын нам засагт нийлж хийсэн холион бантан Монголын ард түмэнд хэрэгтэй болсон уу гэвэл үгүй.

Өнөөдөр бүгд амаа хамхиад л бүгд чимээгүй гүйгээд л байна. Өчигдөр сайд нарыг бүгд л дэмжээд санал өгөөд суугаад байсан. Би дургүй хүрээд эсрэг санал өгчихөөд гараад явчихсан. Сөрөг хүчин ийм байж болохгүй. Манай намаас ийм хүмүүсийг сайдад нэр дэвшүүлсэн бол АН яаж үсэрч байгаа бол. 

Сайдын томилгоо гэдэг чинь хяналтын хөшүүрэг. Бурууг нь хэлээд, цаашид хийх ажлыг нь, чиглэлийг нь хэлж өгдөг. Гэтэл юу ч хэлэхгүй, юу ч байхгүй дэмжээд л суугаад байсан. Ийм сөрөг хүчин байж болох уу гээд гайхаад л сууж байна.

Б.Бат-Эрдэнэ

bolod.mn