Нийт хүүхдийн 85 хувьд хүүхдийн мөнгө олгогдоно

2012 оны 10 сараас Хүний хөгжлийн сангаас хишиг хувь болгон хүүхэд бүрт сар бүр 20 мянган төгрөг олгож эхэлсэн. Ирэх оноос хүүхдийн мөнгийг зөвхөн Монгол Улсын өрхийн мэдээллийн нэгдсэн сангийн 1-17 бүлэгт багтсан айл өрхийн 823 мянга гаруй хүүхдэд олгохоор шийдвэрлээд байгаа. Ингэхээр бүх хүүхдийн 85 хувь нь хүүхдийн мөнгө авч, үлдсэн 15 хувьд нь мөнгө олгогдохгүй гэсэн үг.

Нийгмийн халамж үйлчилгээний газраас нийт 712 мянган өрхийн 2.3 сая иргэнийг хамруулсан. Ингэхдээ өрх бүрт өдөр тутам, сарын хэрэглээнд суурилсан 1000 хүртэлх оноогоор үнэлгээ өгч, 20 бүлэгт хувааж эрэмбэлсэн байна. Тодруулбал, өрхүүдийн хэрэглээн дээр тулгуурлан жагсаалт хийсэн. Үүнд 1-17 бүлэгт зорилтот бүлэг, 18-20 бүлэгт амьжиргааны түвшин дээгүүр гэсэн өрхүүд багтах юм.

Аль бүлэгт хамрагдсанаа хэрхэн мэдэх вэ ?

Дээрх бүлгийн алинд хамрагдсанаа мэдээгүй бол хороо, сум, дүүргийнхээ нийгмийн халамжийн хэлтэс, мэргэжилтэнд хандаж тодруулах боломжтой. Мөн амьжиргааны бүлгээ хүлээн зөвшөөрөхгүй, өрхийн мэдээллийн нэгдсэн сангийн судалгаатай санал нийлэхгүй бол харъяа дүүргийнхээ нийгмийн халамж, үйлчилгээний төвд дахин өргөдөл гаргаж, өрхийн амьжиргаагаа нягтлуулах боломжтой.

Иргэд хүүхдийн мөнгөө хэрхэн авах, өрхийн амьжиргааны хэддүгээр бүлэгт харъяалагдах талаар мэдээлэл муу байгаа. Тэгвэл ямар айлын хүүхэд мөнгө авах вэ?

Зарим эцэг эх хүүхдийн мөнгөө авья гэсэн хүсэлтэй байгаа бол дахин судалгаанд хамрагдаж болно. Судалгааны багийнхан газар дээр нь очиж бодит байдлыг шалгана. 18-20 бүлэгт хамрагдсан иргэдийн хувьд амьжиргааны түвшин дээгүүр гэсэн ангилалд багтаж байна гэж ойлгож болох аж. Харин дахин судалгаанд хамрагдаад 1-17 бүлэгт хамрагдсан бол таны хүүхэд хүүхдийн мөнгө авах бүрэн нээлттэй гэсэн үг.

2016 оны хүүхдийн мөнгөний төсөвт 144 тэрбум төгрөг баталсан нь өнгөрсөн оны төсвөөс 40 хувиар буурсан үзүүлэлттэй байгаа юм. Хүүхдийн мөнгөнд зарцуулах төсвийг бууруулсантай холбоотойгоор УИХ-аас 103 дугаар тогтоол гаргаж, өрхийн амьжиргааны түвшний 20 бүлгийн 1-17 бүлгийн өрхийн 0-18 насны хүүхдэд олгохоор шийдвэрлээд байна .

 

Л.Ариун

 




Эх сурвалж: TIMES.MN

1 11