УИХ-ын 2020 оны сонгууль болж, улмаар 6 сарын 30-нд шинээр сонгогдсон УИХ-ын гишүүд тангараг өргөн, бүрэн эрхээ хэрэгжүүлж эхлээд байна.

Үүнтэй холбоотойгоор МАН-ынханд Засгийн Газраа бүрдүүлж, албан тушаал хувиарлах, бусад намуудад улс төрийн цаашдын үйл ажиллагаагаа төлөвлөх, чухал байрлалаа эзлэх асуудал тулгамдаад байна.Тэр дундаа шинэ тутам байгуулагдсан ШИНЭ намын хувь заяа цаашид хэрхэх нь нэн ээдрээтэй байгаа юм.

Учир нь тус намыг  УИХ-ын 2020 оны сонгуульд АН-ын саналыг хуваах зорилгоор Ж.Батзандан, Л.Болд нар байгуулсан, тус намын үйл ажиллагаанд эрх баригчид маш их дэмжлэг үзүүлсэн гэх дүгнэлт улс төрийн хүрээнд байдаг.

Гэвч тус нам, тус намын байгуулсан эвсэл УИХ-д суудалтай болж чадсангүй.

УИХ-ын 2020 оны сонгуулийн дүн гарсны маргааш ШИНЭ намын төв зөвлөлийн дарга Л.Болд, ШИНЭ намын дарга Ж.Батзандан, БНН-ын дарга Б.Жаргалсайхан, МҮАН-ын дарга Б.Цогтгэрэл нар мэдээлэл хийж, "Ардчиллын төлөөх намуудыг нэгтгэхийн төлөө явна", "Сонгуульд ялагдсан хариуцлагаа хүлээж, Ж.Батзандан намын даргын албан тушаалаасаа огцорч байна" гэж зарласан юм. Энэ бүхний шалтгаан ч тодорхой болж эхлээд байна.

Тодруулбал ШИНЭ намынхан АН-д нэгдэж, хамтарч ажиллах болох тухай хүсэлтээ албан бус байдлаар хэдийн илэрхийлсэн болохыг эх сурвалж нотолж буй юм.

Мөн хэрэв уг хэлэлцээр амжилтгүй болвол Л.Болд, Ж.Батзандан нар АН-ын гишүүнээр дахин элсэх хувилбар байгаа аж.

 

С.Сарнай