УИХ дахь бие даагч гишүүдийн зөвлөл өнөөдөр мэдээлэл хийлээ. Тэд энэ долоо хоногт УИХ-ын байнгын хороо, чуулганы хуралдаанаар хэлэлцэх асуудлын талаар байр сууриа нэгтгэжээ. 
Тухайлбал, Газрын тосны хуулийг өмнө нь унагасан  ч дахин өргөн барьсан. Гэтэл шинэ хууль нь гэрээнүүдэд өөрчлөлт оруулахгүй, бүтээгдэхүүн хуваах гэрээний асуудлыг тоо тавихгүйгээр Засгийн газар шийднэ гэсэн нь буруу гэдгийг шүүмжиллээ. 
Энэ үеэр УИХ-ын гишүүн С.Ганбаатар УИХ-ын 9 гишүүний бүрэлдэхүүнтэй албан бус бүлэг байгуулах гэж байгаагаа дуулгасан юм.  Тэрбээр “Та нар УИХ-ын байж байгаа царайг нь хардаа.  Би парламентыг ийм байна гэж ерөөсөө бодоогүй.  Олонхийн эрх ашгийн төлөөх шийдвэрийн өмнө дандаа бүлэглэлийн шийдвэр ордог.  Бүлэг гэдэг дарамтанд орж байгаа хүмүүс АН, МАН-д ч бий.  Бүлгийн дарамтаас болж өнөөдөр шударга гишүүд нь дуугарч чадахгүй байна. Энэ албан бус бүлэг байгуулна гэдэг асуудлыг сүүлийн сар ярьж байна.  Удахгүй эцсийн байдлаар олон нийтэд танилцуулна.  Одоогийн байдлаар 10 гишүүн албан бус бүлэгт орохоор нэгдсэн.  Ер нь доод тал нь 10 гаруй гишүүнтэй байхад ард иргэдийн төлөө, олонхийн төлөө бид шийдвэрээ гаргаж чадна гэж итгэж байгаа” гэсэн юм.  Түүнчлэн "Шударга ёс" эвслийн бүлгээс 4, АН-аас хэд хэдэн гишүүд албан бус бүлэгт нэгдэхээ илэрхийлээд байгаа аж. Албан бус бүлэг нь тодорхой 3-4 асуудлыг сонгон авч, тэр асуудлаа шийдвэрлэхийн тулд үзэл бодол, саналаа нэгтгэх юм байна. 

Д.Анар