Засагт хамтарсан АН-ынхны дотоод улс төр задгай хэвээрээ л үргэлжилж буй. Тэдний нэг хэсэг нь энд, нөгөө хэд нь тэнд эрс тэрс улс төр хийцгээгээд, учир жанцанг нь ойлгоход хэцүү.

Гэхдээ тарж бутарсныхаа гайгаар хэдэн том сонгуульд дараалан нам тавиулсан гашуун түүхээсээ нэг их холдоогүй яваа. Удахгүй Ерөнхийлөгчийн ээлжит сонгууль болно. Тиймээс сүүлийн үед өмнөх алдаандаа ихээхэн дүгнэлт хийсэн болов уу гэмээр үйлдлийг хийж буй харагдах болов.

 

Жишээ нь, жижиг намуудыг нэгтгэж байна. Энэ бол санаандгүй, эсвэл хийхээ олж ядсан ажил огт биш. Хоёр жилийн дараа, сонгууль гэхэд чулуу болохоор нүүдэл л хийчих шиг боллоо.

 

Ийм “нэгдэл” нь нэгээр тогтохгүй ч бололтой юм билээ. Түүнчлэн сүүлийн жилүүдэд АН-ын баярын өдөр болоод буй дөрөвдүгээр сарын 7-нд 2027 оны Ерөнхийлөгчийн сонгуулийн бэлтгэлийг хангах ажлын хэсгээ албан ёсоор байгуулах талаар ч ярьж байгаа юм байна. Үүнтэй зэрэгцээд нэлээд хэдийнээс “...2027 онд Ерөнхийлөгчид нэр дэвшинэ” гээд дотроо нуух шахам явж байсан улстөрчид цээжин дэх буглаагаа гаргаж, энэ талаараа яриад эхэлжээ.

 

Одоогоор, Ерөнхийлөгчийн сонгуулийн сунгаанд оролцох хүсэлтэйгээ ямар нэг байдлаар зохих түвшинд илэрхийлж, ил болгосон АН-ын зургаан улстөрч байна.

 

Тодруулбал, УИХ-ын гишүүн, Тэргүүн Шадар сайд, АН-ын дарга Лу.Гантөмөр, УИХ-ын дэд дарга Б.Пүрэвдорж, УИХ-ын дарга асан, ЕТГ-ын дарга асан, АН-ын дарга асан З.Энхболд, УИХ-ын гишүүн С.Ганбаатар, УИХ-ын гишүүн, Ерөнхий сайд асан, АН-ын дарга асан Н.Алтанхуяг, УИХ-ын гишүүн, АН-ын Улс төрийн зөвлөлийн гишүүн Х.Тэмүүжин нарын АН-ын зургаан улстөрч долоо дахь Ерөнхийлөгчид зүтгэхээр бэлдэж байгаа аж.

Б.БАЯР

Эх сурвалж: “Зууны мэдээ” сонин