Дуучин, жүжигчин Д.Лхагвын “LVA” энтертайнмент дэлгэцийн дөрөв дэх бүтээлээ туурвиж байна. “Мухар гудамж” хэмээх шинэхэн бүтээлийнх нь зураг авалт дуусах шатандаа орсон бөгөөд кино зохиолыг жүжигчин Д.Лхагва, найруулагч Д.Баярсайхантай хамтран бичиж, өөрөө продюсерээр нь ажиллаж байна.

Тус киноны ерөнхий найруулагчаар ажиллаж байгаа Д.Баярсайхан өмнө нь “Амьдралд тавтай морил” олон ангит кино, “Валентины захидал” киноны ерөнхий найруулагчаар тус тус ажиллаж байсан туршлагатай. Харин киноны ерөнхий зураглаачаар “IDEA SOURCE” студийн О.Эрдэнэбат ажиллаж байгаа бөгөөд үзэгчдийн талархлыг хүлээсэн “Франц үнсэлт”, “Валентины захидал” киноны зургийг авч байсан.

“Мухар гудамж” кино нь “LVA” энтертайнментын хувьд, сэдэв, агуулга, хийцээрээ өмнөх бүтээлүүдээс тэс ондоо бөгөөд action, drama жанраар бүтээгдэж байгаа юм. Монголын өнөөгийн нийгмийн амьдралын үнэн бодит өнгийг харуулах тус бүтээл хөндөх сэдэв, хамрах хүрээгээрээ ч өргөн далайцтай дуугарч байгаа.

Тодруулж хэлбэл, хүн хүний харилцаа, эрх мэдэлтэнгүүдийн бодлого, шийдвэр, өнгө мөнгөнөөс үүдэж, нийгмийн салбар бүрт асуудал, саад бэрхшээл үүсч, мухардалд ордогийг “Мухар гудамж” тод томруунаар харуулах нь ээ.

Туурвисан бүтээл бүрээрээ кино урлагт хүчтэй хамт олон байж чадна гэдгээ харуулсан “LVA” энтертайнментын шинэ бүтээл өмнөх кинонуудын нэгэн адил үзэгчдэд шинэ мэдрэмж амтлуулж, нэгийг бодогдуулж, ямар нэгэн санаа, ухаарал өгөх биз ээ.

“Мухар гудамж” уран сайхны кино ирэх 11 дүгээр сард нээлтээ хийх урьдчилсан төлөвлөгөөтэй байна.