Монгол Улсын 28 дахь Ерөнхий сайд тодроод гурав хонож байна. АН наана, цаана бүх тохироог хийж байж Ч.Сайханбилэгийг гаргасан хэмээн шуугих улс төрчид цөөнгүй.

Ямартай ч эдийн засгийн хямралтай энэ цаг үед одоо байгуулагдах Засгийн газар “Золиосны засгийн газар” хэмээн Ерөнхийлөгч Ц.Элбэгдорж сануулаад амжсан. Тэгвэл үүрэгт ажлаа авсан даруйдаа Ч.Сайханбилэг Засгийн газрыг хуралдуулж, ЗГХЭГ-ын Тэргүүн дэд даргаа томилоод байгаа. Мөн тэрбээр өчигдөр их эзэн Чингис хааныхаа төрсөн өдрөөр 16 настнуудтай уулзаж тэдний санал сэтгэгдлийг сонссон гэх.

Яг энэ үер Ерөнхий сайд асан Н.Алтанхуяг осолд орсон байна. Тодруулбал, Н.Алтанхуяг өчигдөр өглөө мотоцикл унаж яваад осолд оржээ. Тэрбээр Төв аймгийн нутаг Цонжинболдог орчимд АТV маркийн дөрвөн дугуйтай мотоциклтой ганцаар явж байгаад осолдсон гэх мэдээлэл түгээд байна. Экс Ерөнхий сайдын биеийн байдал хүндэвтэр байгаа бөгөөд яаралтай эмчилгээнд орсон байна. Энэ харамсалтай явдал Монгол бахархлын өдөр тохиосон баартай явдлын нэг болов. Ослын улмаас түүний эгэм нь хугарч, тархи, нуруу нугасандаа гэмтэл авсан гэнэ. Түүний удирдаж байсан Засгийн газар нь огцорч, намын даргын ажлаа хүлээлгэж өгөөд удаагүй байгаа Н.Алтанхуягийн хувьд сэтгэл санаа хүндхэн байгаа нь мэдээж. Дарин дээр давс гэгчээр улс төрийн хүрээнийхэн хийгээд эгэл жирийн ард олны зүгээс түүнийг янз бүрээр муулж ярих нь бий.

Шинэ ерөнхий сайд ажилдаа шаргуу орж Засгийн газрын бүрэлдэхүүнээ томилож улс эх орон хийгээд эдийн засгийн хямралын талаар санал зөвөлгөөн авах гол хүн нь осолд орсон нь Ч.Сайханбилэгт мөн хүндээр тусч байгаа биз ээ. Тэгээд ч Ерөнхий сайд Ч.Сайханбилэг л болно өөр хэн ч биш гэж ярьж явсан хүн яах аргагүй Н.Алтанхуяг билээ. Түүний осолд орсон гэмтэл нилээд хүндэвтэр байгаа бололтой. Эмч нар түүний гэмтлийг Монголд эмчлэх боломжгүй учраас яаралтай гадаадад явж эмчлүүлэхийг зөвлөсөн байна.