УИХ-ын гишүүн, ХХАА-н сайд Р.Бурмаагаар ахлуулсан ажлын хэсгийнхэн энэ амралтын өдрүүдэд Дорнод аймгийн Халх гол суманд ажиллахаар иржээ. Тодруулбал өчигдөр буюу 2015-10-25-ны өдөр 10 гаруй машин цуваагаар явсаар Халхгол сумын Ялалт багт ирж чөлөөт бүсийн талаар мэдээлэл хийхээр ирсэн ч хэдэн цаг машиндаа сууж байгаад эргээд явжээ. Учир нь нутгийн оршин суугчид тэднийг хүлээн авах боломжгүй гэдгээ мэдэгдэж, 75-р тогтоолыг хүчингүй болго гэсэн уриа бүхий тайван жагсалыг хийсэн байна. Эсэргүүцлийн тайван жагсаал Халхгол сумын төвд ч үргэлжилж, 75-р тогтоолоо цуцлахгүй бол манай нутагт хөл тавих хэрэггүй гэсэн сануулгыг албаны хүмүүст өгчээ.

 

 

Нутгийн иргэдийн эсэргүүцэлтэй тулгарсан Р.Бурмаа сайд машинаасаа буулгүй хэдэн цаг болсон бөгөөд орой буцаж явсан байна.

Харин Р.Бурмаа сайд тогтоолыг хүчингүй болгох юм бол олборлолт явуулна. Олборлолт явуулахгүй гэж хөдөө аж ахуйн чөлөөт бүс байгуулж байгаа гэдгийг хэлж байсан. Тодруулбал, “Тогтоолыг хүчингүй болгох юм бол ашигт малтмалын лиценз олгох юм руу л орох байх даа. Уул уурхай юу, хөдөө АА юу гэдэг байгаа. Сүүлийн 2 жилд газрын тосны үнэ маш их уналттай байгаа. Сүүлийн 3 жилд үхрийн махны үнэ өсч байгаа үзүүллтэй байгаа. Хөрсөн дээрх чинь тэнгэрийн хишиг, хөрсөн доорх чинь тэнгэрийн өмч гэж үг байдаг шүү. Халхголын бүс нутаг орчим нь ашигт малтмалын лиценз олгогдох гээд зарлагдчихсан байгаа юмаа. Өмнө нь Петро Чайна дайчин тамсаг ХХК 13 жил хайгуулын лицензтэй байж байгаад буцаагдсан. Одоо дахиад ашигт малтмалын лиценз олгогдох газарт орчихсон байгаа” гэдгийг хэлж байсан.

Дорнод аймгийн Халх гол сум нь Монгол Улсад хамгийн их газар нутагтай сумдын тоонд ордог бөгөөд нийт 2809299 га газартай байна. Үүн дотроо 353.700 га хадлангийн талбай, 49135 га тариалангийн талбайтай. Хэрвээ тус газарт чөлөөт бүс байгуулах юм бол овог дээдсийн булш бунхнаа ухаж сэндийчүүлэх, байгалийн цогцолбор газраа харсаар байгаад устгуулах, айлуудын газар болон өвөлжөө хаваржаанаасаа нүүх зэргээр олон ойлгомжгүй асуудлууд байгаа юм. Энэ бүхнийг хэрхэн шийдвэрлэхээ тодорхой болгоогүй байж чөлөөт бүс байгуулна хэмээн улайрч байгаа нь нутгийн иргэдийн эгдүүг хүргэж, ийнхүү эсэргүүцэхэд хүргээд байгаа юм.

Дорнодын Халхгол сумын иргэд чөлөөт бүс байгуулахыг эсэргүүцсээр байх болно. Өвөг дээдсийн амь насаараа хамгаалж, үр хойч нь болсон иргэд өнөөдрийгхүртэл хамгаалсаар ирсэн. Цаашид үр хүүхдүүд нь харуулын үүргээ гүйцэтгэх болно. Газар нутгаа хамгаална гэдгийг Халхголынхон хэлж байлаа.

Бид Халхгол чөлөөт бүсийн талаар эргэн мэдээлсээр байх болно.

А.Баярмаа