Зам тээврийн яамны Төрийн нарийн бичгийн дарга асан, "Монголын төмөр зам" ТӨХК-ийн ТУЗ-ийн дарга асан Б.Батзаяаг Эрүүгийн цагдаагийн газрын Эдийн засгийн гэмт хэрэгтэй тэмцэх тасгаас өнгөрсөн амралтын өдөр баривчлан саатуулсан. Түүнийг Эрүүгийн хуулийн тусгай ангийн 148.4-т зааснаар “Бусдын эд хөрөнгийг залилан мэхлэж авах гэмт хэргийг онц аюултай гэмт хэрэгтэн, зохион байгуулалттай бүлэг, гэмт бүлэглэл үйлдэж, улсад онц их хэмжээний хохирол учруулсан" хэрэгт сэжиглэн шалгаж байгаа.

Энэ хэрэгтэй холбоотойгоор “Либерти партнерс”-ийн захирал Ч.Ганбат, “МТЗ” ТӨХК-ийн дэд захирал Ж.Бат-Эрдэнэ нарыг мөн шалгахаар болсон. Харин “Либерти партнерс”-ийн захирал Ч.Ганбат нь баривчлах тушаалын сургаар Сингапураас ирэхгүй байгаа гэдгийг эх сурвалж мэдээлж байна.

Тэгвэл Монголын хууль, хяналтын байгууллагаас Ч.Ганбатыг эрэн сурвалжлуулах хүсэлтийг гаргажээ. Улмаар олон улсын хэмжээнд эрэн сурвалжлуулж байна. Тодруулбал, интерполд Ч.Ганбат нь 41 настай, Монгол, анги, орос хэлтэй, мөнгө угаасан болон хөрөнгө завшсан гэх үндэслэлээр эрэн сурвалжилж байгаа юм байна.

А.Баярмаа