Талийгаач Т.Лхагвасүмбэрэл өнгөрсөн 11 сарын 06-ны өдөр Өмнөговь аймгийн Гурван тэс сум явахаар ажлын хамт олонтойгоо тохирчисон байжээ. Харин 05-ны өглөө үүрээр автомашинаа айлын гаражид хийхээр гэрээсээ гараад сураггүй алга болсон байдаг юм. Ингээд ар гэрийнхэн нь Замын удирдлагын төвөөс байрлуулсан хотын замын камерт шүүлгэсэн боловч ямар ч дүрс бичигдсэн байгаагүй ажээ. Гэтэл 22-ын товчооны ойролцоох хувийн компанийн камерт түүний машинтайгаа явж байгаад, бууж бие засаад цааш явж буй дүрс бичигджээ. Эндээс харахад тэрбээр баруун тийш буюу Хөвсгөл аймаг руу машинтайгаа гарсан байгаа юм. Хамгийн хачирхалтай нь яг тэр камерны хажууд улсын замын камер байдаг ч түүний дүрс огт бичигдээгүй. Ингээд мөн Булган аймгийн шатахуун түгээх станцын камерт Хөвсгөл явж буй дүрс нь бичигдэн үлджээ.

Гэтэл 22-ын товчоо, 64-ийн гарам, Гуртын гүүр зэрэг Хөвсгөлөөс Улаанбаатар чиглэлийн авто замыг хянадаг камеруудын алинд ч түүний дүрс бичигдээгүй байдаг. Мөн гэрээсээ гараад хотын аль ч замд орсон 22-ын товчоо хүртэл камер бий. Гэтэл яагаад зөвхөн түүний машин, дүр огт бичигдсэнгүй вэ. Хэн камерыг хариуцаж, дүрсийг устгав. Эсвэл яг тэр үеэр камерийг ажиллагаагүй болгов уу гэдэг маш том сэжиг байгаа юм.

Ингэж байтал алга болсноосоо зургаа хоногийн дараа буюу 11 сарын 11-нд түүний машин Хөвсгөл аймгийн Хатгал тосгон, Хүслийн хадны ойролцоо Балчингартын ар гэх газраас олдсон бөгөөд цогцосыг Хөвсгөл далайн 4 метрийн гүнээс олсон байдаг юм. Тэрбээр амьсгал хураахаасаа өмнө хүмүүст барьцаалагдсан, яах ч аргагүй алуулахаар болсон тухайгаа утсандаа бичиж үлдээсэн нь олон нийтэд ил болсон билээ. Мөн үүнээс гадна түүнийг сураггүй алга болохын нь өмнөх өдөр хүн залгаж, айлган сүрдүүлж, дарамталсан яриаг тэр утсандаа бичиж үлдээжээ. Тэгэхээр түүний амь насыг хөнөөсөн байж болзошгүй хүн нь тэрхүү утсаар дарамталдаг нөхөр ч байж болох нь байна. Үүнийг илрүүлэхийн тулд тухайн гар утасны оператор компанийн нууцлалыг харж хэргийг хөөн илрүүлж болохоор байгаа юм.

Гэтэл уг хэрэгт цагдаагийнхан хөдөлж өгөхгүй байгаа гэдгийг талийгаачийн аав Л.Төмөрсүх удаа дараа хэвлэлээр ярьж байгаа. Мөн ар гэрийнхэн нь хүүгийнхээ үхэлд Тост, Тосонбумбын нуруунд лицензтэй компаниудыг буруутгаж байгаа юм байна. Тэгвэл уг газар одоогийн байдлаар дараах 18 компани лиценз эзэмшиж байгаа бөгөөд ашиглалтын лицензтэй нь УИХ-ын гишүүн Б.Чойжилсүрэнгийн “Саус гоби коэл транс” компани байгаа юм. Бусад компанынх нь хайгуулынх. Тиймдээ ч олон нийт түүний компанийг уг хэрэгт сэжиглэж байгаа нь ажиглагдаж байгаа. Тодруулбал ирвэс хамгаалах сангийн талбайн 50 хувийг Б.Чойжилсүрэнгийн компани эзэмшдэг гэх бичигтэй зураг фэйсбүүкээр түгээгдэж байна. Мөн Хууль зүйн сайд Дорлигжав Б.Чойжилсүрэнгийн үй зайгүй хуурай ах гэдгийг Чойжоо гишүүн нэгэн ярилцлагадаа тодорхой дурдсан байдаг юм билээ. Мөн эл хэрэгт хууль хяналтын байгууллага хариуцлаггүй хандаж байгааг талийгаачийн ар гэрийнхэн болон ард түмэн хэлж байгаа. Ямартай ч тухайн өдрийн хотын камер яагаад түүний дүрсийг бичээгүй болохыг Замын хөдөлгөөний удирдлагын төв нэгэн цагт тайлбарлах биз ээ. Зөрчил гаргасан авто машиныг торгох болохоор тэд уг нь дээрх зурагт харуулснаар илрүүлж, дугаар номерийг нь хүртэл ингэж татаж, шуурхай ажилладаг юм байна.

Н.Ганаа