Цагдаагийн байгууллагын шуурхай дуудлагын утсанд энэ сарын 23-24-нд шилжих шөнө “Хөвсгөл аймгийн Улаан-уул суманд хөдөө малчин айлд гурван хүнийг буудан амь насыг нь хохироосон хэрэг гарлаа” гэсэн дуудлагын дагуу ЦЕГ-ын даргын тушаалаар УМБГ-ын Онц хүнд гэмт хэрэг мөрдөх хэлтсийн дарга, цагдаагийн хурандаа Э.Идэрцогоор ахлуулан тус хэлтсийн ахлах мөрдөн байцаагч, цагдаагийн хошууч Н.Баттөмөр, шүүх шинжилгээний хүрээлэнгийн шинжээч нарын бүрэлдэхүүнтэй ажлын хэсэг гарч тус аймагт ажилласан байна.
Хил орчмын тус суманд оршин суудаг иргэн Н /31 настай/, иргэн Б /25 настай эмэгтэй/ ах дүү хоёр 4 ба 7 насны хоёр хүүхэдтэйгээ амьдардаг ажээ. Хэрэг гарахаас өмнөх өдөр Хөвсгөл аймгийн Арбулаг сумаас ажлаар явж байсан гэх хүмүүс Д /17 настай эрэгтэй/ гэгч хүүхдээ ах дүү хоёрт орхиод явсан байна. Хүүхдээ авах гээд маргааш ирэхэд нь гэрийн эзэн Н, Б, 17 настай Д нарын амь насыг хохироогоод 4 ба 7 насны хүүхдийг гэрт нь түгжиж алга болжээ.
Хэргийн мэдээллийн дагуу Улаанбаатар хотоос дээрх бүрэлдэхүүнтэй ажлын хэсэг шуурхай гарч Хорьдол сарьдгийн нуруугаар самналт хийн 55 цагийн дараа гэмт хэрэгтнийг тайгад айлд байж байхад нь зэвсэглэсэн буу, сумны хамтаар баривчилсан байна.
Хэрэг гарахын урд өдөр тус сумын нэгэн айлд хулгай орж дарвинк маркийн буу, гурван шил архи алдагдсан бөгөөд бууны мөрөөр шалгаж үзсэн нь хэргийг шуурхай илрүүлэхэд нөлөөлсөн байна. Энэ хэргийг илрүүлэхэд Хөвсгөл аймгийн цагдаагийн газар, хилийн цэргийн Улаан-уул дахь застав, шүүх шинжилгээний үндэсний хүрээлэнгийн алба хаагчид хамтран ажилласан байна. 
Гэмт хэрэг үйлдсэн этгээд нь Хөвсгөл аймгийн харъяат, цэргийн алба хаасан, нутагтаа мал маллаж байсан, бага дунд боловсролтой 1993 оны Э, О нарын эрэгтэй байсан байна. 
Мөрдөн байцаах газрын алба хаагчдын шуурхай ажиллагааны үр дүнд гэмт хэрэгтнийг ахин хүний амь насыг хохироож, өөр гэмт хэрэг үйлдэхээс нь өмнө баривчилж, эрүүгийн хэрэг үүсгэн шалгаж байна.

А.Баярмаа