Нэг хэсэг "NTV" телевизээр хэсэг бүлэг хүмүүст зориулсан "Үнэн үү" ток шоуг хөтлөн үзэгчдэд хүргэж олны танил болсон эрхэм бол Р.Нямбаяр. Мөн "Монголын саятан" нэвтрүүлгийг нь уншигч та бүхэн үзэж байсан биз ээ. Тэрбээр анхны FM 102,5-д хөтлөгч хийж ажлын гараагаа эхэлсэн гэдэг. 

Хөтлөгч Р.Нямбаяр өөрийн мөрөөдлийн талаар "өөрийн гэсэн ток шоутай болохыг хүсч байсан. Монголын урлаг соёлынхон, дуучин, жүжигчин, загвар өмсөгч, мисс гээд бүх л сайхан хүмүүстэй ярилцлага хийж чадсан. Хүн бүрт ийм боломж олдохгүй байх. “Үнэн үү” ток шоугаараа 80 гаруй хүнтэй ярилцлага хийсэн байна лээ. Зарим хүмүүст таалагдаагүй гэдгээ мэдсэн. Ойлгосон. Өөрийнхөө хэмжээнд чадан ядан хийсэн. Харамсалтай нь зарим нэг хүмүүст таалагдаагүй. Гэхдээ ганц, хоёр хүнд ядаж таалагдсан байлгүй. Тэдэндээ зориулаад гоё нэвтрүүлэг хийж үзлээ. Ингээд хоёр мөрөөдлөө биелүүлчихлээ. Би ойрын 15 жилд багтаан ярилцлагын гоё нэвтрүүлэгтэй болно" ийн ярьж байсан удаатай.

Тэгвэл түүний ярилцлагийн шоуны мөрөөдөл биелэлээ олсон гэж бодож байна. Учир нь саяхнаас дуучин С.Сэрчмаатай хамтран "NB&SAlly" нэвтрүүлгийг бэлтгэн хүргэж байгаа билээ.

Шулуун үгтэй хөтлөгч залуу маань хүүхэд, багачуудад сэтгэлийн гараа сунгажээ. Тэрбээр эх нялхасын төвд хэвтэн эмчлүүлж буй хүүхдүүдэд зориулан живх бэлэглэсэн байна. Тодруулбал, хөтлөгч Р.Нямбаяр найзынхаа эхнэрийг эргэхээр эх нялхасын төв дээр очиход эргэлтийн хаалганы үүдэнд эмнэлэгт хүүхдийн даавуу угаалгадаггүй юм байна гараад хүүдээ живх аваад ирээч гээд эхнэр нь нөхөртөө 1000 төгрөг өгч байхыг харсан аж.

Үүнээс үүдэн тэрбээр тус эмнэлэгт хэвтэж байгаа бяцхан хүүхдүүдэд живх бэлэглэхээр шийдэн туслажээ. Сайхан сэтгэлт монголчуудаа жижиг ч гэлтгүй нэг нэгэндээ туслаж, сэтгэлийн дэм  хайрлаж байхыг сануулсан хөтлөгч Р.Нямбаяртаа уншигчдынхаа өмнөөс баярлалаа гэж хэлье.

 

Д.Ана