Засгийн газраас “Сайн хувьцаа” зорилтот арга хэмжээг орон даяар хэрэгжүүлж буй. Энэ хүрээнд иргэд арилжааны банкуудад хандан хувьцаагаа зарах хүсэлтээ гаргаснаар эхний ээлжийн 100 мянган төгрөг долоо хоногийн дараа дансанд нь байршиж байгаа юм.

Өнгөрсөн долоо хоногийн эхнээс иргэдийн дансанд мөнгө байршиж эхэлсэн бөгөөд өнөөдрөөс хоёр дахь ээлжийн 100 мянган төгрөг иргэдийн дансанд орж эхэлсэн байна.

Хувьцааны мөнгийг зах зээл рүү гэнэт их хэмжээний мөнгө оруулж, инфляци хөөрөгдөхгүй байх зорилгоор гурав хуваан олгохоор болсон. Энэ дагуу иргэдийн дансанд 300 мянган төгрөг гурав хуваагдан байрших юм. Үлдэгдэл мөнгийг баяр наадмаас өмнө иргэдийн дансанд байршуулна гэж холбогдох албаныхан тодотгож байгаа юм.