Сингапурын эрх баригчид коронавирусээр халдварлах эрсдэлийг бууруулах зорилгоор нийтийн тээврийн хэрэгсэл дотор гар утсаар ярих, бие биетэйгээ харилцахыг хоригложээ.

“Олон үйлдвэрүүд үйл ажиллагаагаа сэргээж, дунд сургуулиуд, их, дээд сургуулиуд хичээлээ эхлүүлэн амьдрал аажмаар хэвийн байдалдаа эргэн орох үед нийтийн тээврийн хэрэгсэл дотор хоорондоо нэг метрийн зай барих маш хэцүү гэдгийг бид бүрэн хүлээн зөвшөөрч байна” гэж коронавирустэй тэмцэх асуудлыг хариуцсан бүлгийн хамтран даргалагч, Үндэсний хөгжлийн сайд Лоуренс Вон онцлон тэмдэглэсэн байна.

Тиймээс “бид аюулгүй байдлыг хангах зарим арга хэмжээг зайлшгүй авах шаардлагатай”. Тухайлбал, “метро, автобусаар зорчихдоо иргэд гар утсаар ярих, бие биетэйгээ харилцахаас зайлсхийх хэрэгтэй” гэж тэрбээр дурдаад “амны хаалт заавал зүүх журам хэвээр хэрэгжинэ” гэдгийг сануулсан байна.

Сингапурын эрх баригчид зургадугаар сарын 1-нээс эхлэн хорио цээрийн дэглэмээс аажмаар гарахаар төлөвлөж байгаа юм. Коронавирусний цар тахлын улмаас дөрөвдүгээр сарын 7-нд тогтоосон хязгаарлалтын хатуу дэглэм зургадугаар сарын 1-нд дуусна. Үүнтэй холбоотойгоор Сингапурын Засгийн газар хорио цээрийн дэглэмээс гарах арга хэмжээг гурван үе шаттай хэрэгжүүлэхээр төлөвлөж буйгаа тавдугаар сарын 19-нд мэдэгдсэн юм. Эхний үе шатанд зарим аж ахуйн нэгжүүдийн үйл ажиллагааг сэргээж, цэцэрлэг сургуулиудыг нээх бол сар орчмын дараа кафе, зоогийн газрууд, бүх дэлгүүр, спорт, фитнес клубүүд нээгдэнэ.

Д.Жаргал

Эх сурвалж: Монцамэ агентлаг