Одоогоос жилийн өмнөөс л ирэх Ерөнхийлөгчийн сонгуульд нэр дэвшигч нарын таамаг сураг гарсаар ирсэн бөгөөд ирэх сонгуульд одоогийн Ерөнхийлөгч У.Хүрэлсүхийг дахин нэр дэвшиж, АН-аас Х.Баттулгыг дахин горилж буй гэх яриа улс төрийн хүрээнд ам дамжин яригдаад удаж байгаа.

Өнгөрсөн долоо хоногт УИХ дахь АН-ын бүлэг мэдээлэл хийхдээ Ерөнхийлөгчийг дахин нэр дэвшүүлэхгүй байх санаачилга гаргаж буйгаа товчхон ярьсан байдаг. УИХ-ын гишүүн Х.Тэмүүжин "АН-ын бүлгийн 42 гишүүн Үндсэн хуулийн тогтвортой байдлыг хамгаалахын тулд Ерөнхийлөгч дахин сонгогдож болохгүй гэдэг дээр тууштай, хатуу зогсох ёстой гэх шийдлийг гаргахаар ярилцлаа" хэмээн мэдэгдэж байсан.

Тэгвэл энэ асуудлыг УИХ-д суудалтай Ардчилсан намын 42 гишүүний 36 гишүүн нь дэмжин гарын үсэг зурсан гэх мэдээлэл байна. Дэмжсэн гэх Ардчилсан намын эдгээр гишүүний дунд Ерөнхийлөгч асан, УИХ-ын гишүүн Х.Баттулга байсан бөгөөд тэрбээр энэ санаачлагыг дэмжиж гарын үсэг зурсан гэх улс төрийн хүрээнийхэн дунд яриа гарчээ.