Нийслэлийн 171 ерөнхий боловсролын сургуулийн 1-5 дугаар ангийн 189,600 хүүхэд "Сүү" хөтөлбөрт хамрагдаж эхэллээ.

Нэг сурагч сарын хугацаанд 5400 төгрөгийн үнэтэй сүү уух бөгөөд эцэг, эхчүүд долоо хоногийн нэг өдрийн сүүний мөнгө болох 1350 төгрөгийг төлөх юм байна.

Хүүхдийн өсөлт, хөгжлийг дэмжих, бие махбодын дархлааг сайжруулах зорилгоор “Сүүн дархлаа” зорилтот хөтөлбөрийг 2024 оноос хэрэгжүүлж эхэлсэн. Энэхүү хөтөлбөр хэрэгжсэнээр хүүхдүүдийн эрүүл мэнд, өсөлт хөгжилд эерэг нөлөө үзүүлж байгааг албаныхан хэлж буй. Тиймээс хөтөлбөрийг үргэлжлүүлэхээр нийслэлийн 2026 оны төсөвт 8.9 тэрбум төгрөгийг тусгажээ. Сүү хөтөлбөрийн санхүүжилтын хувьд тухайлбал, Монгени сургууль сурагч нартаа долоо хоногт 3 өдөрт сүү өгнө. Ингэхдээ Даваа гаригийн сүүг Нийслэлийн засаг даргын санхүүжилт, Лхагва гаригт дүүргийн засаг даргын тамгын газрын санхүүжилт, Баасан гаригт эцэг, эх, асран хамгаалагч нарын дэмжлэгтэйгээр хэрэгжих нь ээ.

Сүү хөтөлбөрт нийслэлийн 1-5 дугаар ангийн 189,600 хүүхэд хамрагдаж байгаа бөгөөд ирэх жилээс 1-12 дугаар ангийн бүх хүүхдийг тус хөтөлбөрт хамруулах зорилт тавиж байгаа бөгөөд сүүний савыг хог хаягдал болгохгүйн тулд эвхэж цуглуулан сүүний компаниуддаа буцаан өгөх шийдэлд хүрсэн гэдгийг албаныхан мэдээлсэн юм.