АН-ыг дотроо хэд хэдэн фракц болон хуваагдчихсан нам гэдгийг олон нийтэд сайн мэдэх болсон. Тэгвэл АН-ын Үндэсний бодлогын хороо /ҮБХ/-нд гишүүдийнхээ тоогоор аль фракц илүү жин дарах вэ гэсэн дотоод өрсөлдөөн аль хэдийнээ эхлээд буй. Тухайлбал, нийслэлийн есөн дүүрэгт УИХ дахь АН-ын бүлгийн гишүүд нөлөөгөө тогтоохоор талцан ажиллаж эхэлжээ.

Ардчилсан намын аймаг, дүүргийн намын хороод гуравдугаар 16 /2026.03.16/-нд нэгэн зэрэг хуралдаж, Үндэсний бодлогын хорооны 370 гаруй гишүүдээ тодруулна. Иймд УИХ-ын нэр бүхий гишүүд нийслэлийн дүүрэг бүр дээр эзэн сууж, өөрсдийн хүмүүсээ АН-ын Үндэсний бодлогын хорооны гишүүн болгохоор ажиллаж буй талаарх яриа чих дэлсэж эхэлсэн юм. Энэ яриа ч ортой бололтой. Говь-Алтай аймгаас парламентад сонгогдсон Б.Пүрэвдорж, О.Амгаланбаатар нар Баянгол дүүргийн АН-ын даргыг дуудаж дүрмийн бус шаардлагыг тавьж, дарамжталсан гэх мэдээллийг олон нийтэд цацлаа.