УИХ-ын гишүүн Д.Тэрбишдагва МАХН-ын дэд даргаас чөлөөлөгдөх хүсэлтээ намынхаа гүйцэтгэх товчоонд албан ёсоор гаргажээ. Харин МАХН-ын дарга Н.Энхбаяр гадаадад яваа тул түүнд хариу өгөөгүй байгаа юм байна. Энэ ч байтугай намаас хүртэл гарах гэнэ.

Д.Тэрбишдагва нэгэн цагт түүний “бөгсийг долоож явсан” атлаа сонгуулийн өмнө яагаад ингэх болов. Уг нь АН, МАН хоёр ирэх сонгуульд ирээдүйгүй байгаа бөгөөд МАХН хүчирхэгжиж, сонгуулиар нэлээд том ялалт байгуулж болзошгүй тул эрх баригч намаас МАХН-ыг хөнөөх олон ажил хийж байгаа юм билээ. Тэгвэл олон янзын арга сэдэн хар пиар хийж, бие биенийхээ толгой дээр гишгэлэн өгсөхөөр зэхэж, Н.Энхбаярыг унагах ажиллагаа эхэлсэн хүнд үеийг далимдуулан Д.Тэрбишдагва дээш гарахаар ийнхүү зэхжээ.

 

Учир нь нууц гэх бичлэгийг олон нийтэд харуулж, Н.Энхбаяр болоод түүний эхнэр Цолмонгийн “муухай” үнэн төрхийг ил болгосон энэ цагт Д.Тэрбишдагва эр хүний шинжгүй зан гаргаж байгаа нь улстөрийн бодлогоор дайран дээр давс нэмж буй хар пиар гэж ойлгож бас болох юм.

 

Тодруулбал Н.Энхбаярын “Монгол тулгатны 100 эрхэм” нэвтрүүлгийн үеэр ярьж байсан олон нийтэд ил болоогүй, бичлэгээс хасагдаж үлдсэн хэсгийг цахим ертөнцөд тараасан билээ. Үүнийг “Херо”-гийн Баатар өчигдөр хэвлэлийн хурал хийж, тайлбарлахдаа “уг бичлэгийг хулгайд алдсан. Шүүх хяналтын байгууллагаар шалгуулна. Маш том бүлэглэл манай нэвтрүүлгийн хэд хэдэн бичлэгийг хулгайлсан” гэв.

 

Түүний энэ ярианд ард түмэн итгэхгүй байгаа нь ажиглагдаж байгаа. Угаас Д.Тэрбишдагва сүүлийн нэг жил гаруйн хугацаанд МАХН-ын дарга Н.Энхбаяртай байр суурь зөрөлдөх болсон талаараа өнгөрсөн жилүүдэд цухуйлгаж байсан. Мөн УИХ дахь МАХН, МҮАН-ын “Шударга ёс” эвслийн бүлгийн дарга болох түүний саналаас ч татгалзсан аж.

 

Эх сурвалжуудын өгүүлж буйгаар Д.Тэрбишдагва зөвхөн дэд даргаасаа татгалзаад зогсохгүй, МАХН-аас гарах гэж байгаа юм билээ. Тэрбээр Архангай аймагт МАН-аас нэр дэвшихээр шийдсэн аж.

 

Тэгэхээр Н.Энхбаярын нэр хүнд ганхаж буй долоо хоногийн дундуур ийм шийдвэр гаргаж, олон нийтэд мэдээлж буй Д.Тэрбишдагвын гол зорилго нь Архангайчуудад таалагдах болж таарлаа.

 

Бусдыг харлуулж, өөрийгөө голоос нь сугалах гэсэн увиагүй улстөрчдийн сонгуулийн хорон ажиллагаа ийнхүү эхэлсэн байгаа юм. Уг нь яг үнэндээ МАН болон АН, МАХН, Н.Энхбаяр Д.Тэрбишдагва нар аль нь ч ялгаагүй “Хар хэрээ” байтал өөрсдийгөө “Цагаан тагтаа” болгож харагдуулах бүх төрлийн аргыг ашиглаж байна.

 

Өмнөх жилүүдэд тэдэнтэй хамт төрийн гал тогоонд явж, хамаг бүгдийг хамт хийчихээд, улстөрчид болоод, намуудын нэр хүнд навс унасан өнөө цагт уснаас хуурай гарахын тулд намаа сольж, ард түмний өмнө тал засдаг хувиа хичээгчдийн цувааг Д.Тэрбишдагва ийнхүү үргэлжлүүлэх нь.

 

Н.Ганаа