УИХ-ын гишүүн Ч.Хүрэлбаатар өнгөрсөн хавар нутагтаа ялалт байгуулна, чаддаг юм бол надтай өрсөлд хэмээн ам гарч байв. Ингээд 2016 оны УИХ-ын ээлжит сонгуулийн үеэр Увс аймагт нэр дэвшиж, амласан ёсоор ялалт байгуулсан. Гэвч өмнө нь гаргаж байсан зөрчлөө дахин давтаж, түүний туслахууд мөнгө тараасан гэх мэдээлэл гарлаа. Харамсалтай нь мөнгө амласнаас болж, нярай хүүхэд эндсэн хэрэг гарчээ. Тодруулбал, сонгуулийн өдөр буюу өнгөрсөн сарын 29-нд Ч.Хүрэлбаатарын шадар туслахууд сумын төвөөс алслагдсан иргэдийг машинаар зөөж санал өгүүлжээ. Ингэхдээ Увс аймгийн Түргэн сумын иргэн С.Отгонтуяаг төрөөд 20 гаруй хонож байхад нь саналаа өг, 100 мянган төгрөг өгнө, нөхөртэй гээ хамт яв, жийп машинаар аваад явъя гэсэн аж.

Тэндээсээ хүмүүс цуглуулсаар байтал машин нь дүүрч, нярай хүүхэд олон хүнтэй машинд чихэлдэж явсаар санал авах байр руу явж байхдаа амьсгалын дутагдалд оржээ. Учир нь тэр машин нь жийп биш, микро автобус байсан аж. Ингээд нярай эмнэлэгт хүргэгдэж, эрчимт эмчилгээнд орсон ч өвчнөө даалгүй 7 сарын 01-ны өдөр нас баржээ.

Увс аймгийн Ардчилсан нам дээр дээрхи үйл ажиллагааг эсэргүүцэж, Ч.Хүрэлбаатарыг татуулахаар Ерөнхийлөгчид хандсан гарын үсэг цуглуулж эхэлсэн байна.

Өмнө нь буюу 2012 оны сонгуулиар Ч.Хүрэлбаартар УИХ-ын 15-р тойрог, Увс аймагт МАН-аас нэр дэвшихдээ иргэдийн санал худалдаж авсан гэх хэргээр удаа дараа хуулийн байгууллагад шалгагдаж, мөнгө тараасан баримт нь ил болсон ч хариуцлагыг туслахууд нь үүрээд, ял сонссон байдаг. Тухайн үед мөн л иргэн бүрт 100 мянган төгрөг тараасан байв. Тодруулбал тэд иргэдийн саналыг авах зорилгоор Увс аймгийн Тариалан сумын 13 хүнд мөнгө тараасан гэдэг нь нэгэнт батлагдаж, мөнгө тараах ажлыг нь гүйцэтгэсэн долоон хүн шүүхээс ял авсан байдаг юм. Ямартай ч нярай хүүхэд эндсэн гэх хэргийг хууль цагдаагийнхан шалгах биз. Э.Бат-Үүл дарга МАН-ын нэр дээр бор халзан хонь ч байсан гарахаар байлаа гэсэн. Тэгвэл МАН-ын нэг бор халзан хонь нь Ч.Хүрэлбаатар болж таарах нь уу. Тэрбээр нярай хүүхдийн амь насаа алдсан хэрэгт буруутгагдах ёстой хүн мөн үү. Эсвэл мөн л туслахуудынх нь буруу юу.

Г.Наран

эх сурвалж: Cityinfo.mn