Долоодугаар сарын 15-ны өдөр “JET” скүүтерийн компанийн ажилтан Т нь Сонгинохайрхан дүүргийн нутаг дэвсгэрт байрлах иргэний гэрт зөвшөөрөлгүй орж, дуу дүрсний бичлэг хийн, цахим орчинд нийтэлсэн.

Бичлэгт гарч буй шар үстэй эмэгтэйд холбогдуулж "JET" компаниас гомдол гаргаагүй юм байна. Өөрөөр хэлбэл бусдын эд зүйлийг зөвшөөрөлгүй хувьдаа авсан үйлдэлд нь гомдол гаргаагүй. Мөн тухайн эмэгтэй хэрэг хүлээх чадваргүй нь тогтоогджээ.

Гэхдээ өмнө нь мэдээлж байсанчлан "JET" компанид оршин суугчийн зөвшөөрөлгүйгээр дүрс бичлэг хийсэн үйлдэлд нь 2 сая төгрөгийн торгууль ноогдуулаад байгаа юм.

Тодруулбал, Зөрчлийн тухай хуулийн 6.22 дугаар зүйлд заасан зөвшөөрөлгүй гэрэл зураг авах, дууны дүрсний бичлэг хийх /1.Оршин суугчийн зөвшөөрөлгүйгээр орон байранд, эсхүл гадна талаас орон байрны доторх орчны гэрэл зураг авсан, дууны, дүрсний, дуу-дүрсний бичлэг хийх заалтыг зөрчсөн тул Зөрчлийн тухай хуулийн дагуу шалгагдаж байсан юм.

Улмаар уг хуульд иргэнийг хоёр зуун нэгжтэй тэнцэх хэмжээний төгрөгөөр, хуулийн этгээдийг хоёр мянган нэгжтэй тэнцэх хэмжээний төгрөгөөр торгоно гэж заасан байдаг.

Тиймээс хуулийн дагуу тус компанийг 2 сая төгрөгөөр торгож шийдвэрлэсэн байна.