Улстөрийн өнөөгийн нөхцөл байдал тун эгзэгтэй үе дээрээ байна. Н.Алтанхуяг гэдэг “Муу хүн”-ий хөл дээр нь босгосон бүтээн байгуулалт, эв нэгдлийг цаашид дэвслэн хаяж ард түмнийхээ итгэлийг хөсөрдүүлэх үү, аль эсвэл арчилж тордоод аваад явах чадамжтай хүнийг сонгох уу гэдэг чухал сонголтын өмнө ирээд байна.

Сонгуульд намаа удирдан орж 5 удаа ялалт байгуулсан, УИХ-д намын бүлгээ олонх болгож чадсан, орон нутагт ялуулсан, Шинэчлэлийн Засгийн газрыг бүтээн байгуулалтын Засгийн газар гэж хэлтэл нь ажиллаж чадсан ийм л хүнээ үгүйсгэж, ажиллаж чадахгүй байна хэмээн тал талаас нь боорлосоор унагаалаа.

Гэтэл түүний орыг Р.Амаржаргал гэгч математикч залгана гэх мэдээллийг АН-аас төрсөн 8 “түгжил” тарааж эхэллээ.

Тэдний санал болгоод, дэмжээд байгаа Р.Амаржаргал Ерөнхий сайдын албыг хаших хүн үнэхээр мөн үү, тэр чадах уу гэдэг олон асуулт ургана. Эл асуултуудын хариултад  УИХ-ын гишүүн Р.Амаржаргалын улстөрд гаргасан мөрийнх цөөхөн жишээг дурьдахад л хангалттай байх.

Бид тэр жил Р.Амаржаргал гэдэг даргатайгаар сонгуульд ороод ганцхан суудал авч байсныг ард түмэн мартаагүй байх. Ерөнхий сайдын хувьд ч, намын даргын хувьд ч тэр, намдаа ганц ч суудал нэмээгүй.

Энэ бол том үзүүлэлт. Үүнийг тооцох л ёстой. Мөн Засгийн газраа унагаах кноп дарж “түгжил”-дчихээд өөрөө Ерөнхий сайд болдог жишиг тогтвол ямар ч Засгийн газар удаан тогтохгүй.

Үүний үр дагаварт нь ард түмэн хохирч хоцорно гэдгийг бодолцох нь чухал. Үндсэндээ Р.Амаржаргал ард түмнээ хохироох уу, өөрөө Ерөнхий сайд болж хожих уу гэдэг сонголтыг хийнэ.

Улстөр тогтвортой байж л эдийн засгийг босгоно шүү дээ. Р.Амаржаргал ид шидтэн биш л бол түүний хоосон имижэнд улс орныг найдан орхиж болохгүй гэдгийг иргэд  хэлж байна.

 

Э.Мягмар