Энэхүү мэдээг архи, согтууруулах ундааг сурталчилах зорилгоор бус харин сэрэмжлүүлэх зорилгоор нийтлэв.Архи, пиво, ундаа, ус үйлдвэрлэдэг үндэсний үйлдвэрлэгч цөөнгүй бий.  Тэдгээрээс бүтээгдэхүүн тус бүртээ анхаарал хандуулж,  шинжилгээнд оруулсны дараагаар худалдаанд гаргадаг үндэсний ууган үйлдвэрлэгчдийн нэг нь АПУ. Харамсалтай нь 85 жилийн туршлагатай гэх тус үйлдвэр нэгэн хариуцлагагүй үйлдэл гаргаж хэрэглэгчийг хохироосон байна.  Тодруулбал өнгөрсөн амралтын өдөр дэлгүүрээс худалдан авсан дөрвөн “Нийслэл” шар айрагны нэг нь хар өнгийн хог хийсэн юм шиг тундастай, нясуун амттай байжээ. Хэрвээ тэрхүү тундас нь хог байвал яах вэ? Эргэлзэтэй л асуудал. Ингээд тундастай гэгдэх шар айрагийг  гэрэл зургаар баталгаажуулан хүргэе.

500 мл-ээр савлагдсан,  5.0% спиртлэг бүхий энэхүү шар айргийг дээд зэргийн арвайн соёолж, зөрөг цэцэг, байгалийн цэнгэг усыг шилмэл хөрөнгөөр исгэж, шар айрагны уламжлалт технологиор үйлдвэрлэсэн илчлэг багатай, зөөлөн хэмээн үйлдвэрлэгчид нь магтдаг, бас сурталчилдаг. Зургаан сарын дотор хэрэглэхэд асуудалгүй энэхүү шар айраг харамсалтай нь бодит байдал үйлдвэрээс гараад удаагүй байхдаа л ийнхүү асуудал дагууллаа.

Хэрэв энэхүү чанаргүй шар айргийг тундастайг нь мэдэлгүй уусан бол хүн хордох магадлал өндөр. Хэрэглэгч харин азаар уухаасаа өмнө сэгсэрч үзсэн нь ийнхүү хордох аюулаас өөрийгөө аварсан байгаа юм. Нөгөө талаас шинжилгээ, стандарт, норм, нормативыг дээд зэргээр чандлан сахидаг “АПУ” ХХК нэг бол шинжилгээгээ дутуу хийдэг эсвэл буруу хийдэг гэх хардлагыг төрүүлж байгаа юм.

Энэ хариуцлагагүй үйлдлийнхээ төлөө уучлалт гуйж, мэргэжлийн байгууллага зохих хариуцлага хүлээнэ гэдэгт итгэлтэй байна.

А.Баярмаа