УИХ-ын гишүүн Г.Уянга, “2012 оны сонгуулийн дараа УИХ-ын гишүүний тангарага өргөхийн өмнө би Энэ УИХ Монголын нийгэмд өнгөрсөн 25 жилд хуримтлагдсан асуудлуудыг үндсээр нь шийдэх хэрэгтэй” гэсэн уриалга гаргаж байсан.

Энэ уриалга нь УИХ-д суудал авсан бүх улс төрийн хүчин хамтран түр Засгийн газар байгуулж, улс орны өдөр тутмын амьдралын асуудлыг шийдвэрлэх хэрэгтэй гэсэн санааг гаргаж байсан юм. Одоо Ч.Сайханбилэг сайд УИХ-д суудалтай бүх улс төрийн нам, эвслийг хамруулан Засгийн газар байгуулж байна.

Өмнө нь С.Баяраар ахлуулсан АН, МАН-ын хамтарсан Засгийн газрыг байгуулж байсан. Тиймээс энэ бол шинэ зүйл биш. Түүнчлэн өнөөгийн Монгол Улсын өмнө тулгамдсан асуудлуудыг шийдвэрлэх Засгийн газар биш гэж би үзэж байна.

Намууд өнөөдөр эрх мэдэл, албан тушаалын “наймааны хэрэгсэл” болсон байна. Өнөөдөр ч гэсэн Засгийн газар байгуулахад нийгэм, эдийн засгийн өмнө тулгамдсан асуудлыг шийдэх бус аль нам хэдэн яамыг удирдах, хэдэн сайдын суудалтай байх маргаантай сууж байгаа” гэлээ.

Мөн тэрбээр, “Намууд хамтран аливаа хариуцлагыг хүлээдэг тогтолцоонд шилжих хэрэгтэй. Өөрөөр хэлбэл, Үндсэн хууль, Улс төрийн намын тухай хуулийг өөрчлөх, намуудыг гишгүүнчлэлгүй болгох ёстой. УИХ дахь бүх улс төрийн намуудыг нэгтгэсэн Засгийн газар дардан замаар алхахгүй.

Тухайлбал, өрийн хэмжээг нэмэхгүй гэж ярьж байгаа. Гэхдээ МАН зөвшилцөлдөө өрийн хэмжээг нэмэхийг хүлээн зөвшөөрсөн “зальхай” заалтууд оруулсан байна. Тухайлбал, хувийн хэвшилд олгосон Засгийн газрын зээлийн баталгааг өрөөс хасч тооцож, дахин зээлийн баталгаа гаргаж өгөх заалт оруулсан байсан. Энэ нь өрийн хэмжээг нэмэх заль юм

. Тэгэхээр өмнөхтэйгөө адилхан мөнгөтэй олигархуудын МАНАН-гийн Засгийн газар дахин бүрэлдэж байна гэж болно. Одоо байгуулах Засгийн газрыг би “Рио тинто”-ийн Засгийн газар байгуулагдлаа гэж дүгнэж байна.

Оюу толгойн гэрээг нөгөө талын эрх ашигт нийцүүлэх хандлага нь Монголчуудын эрх ашгийг хамгаалах Засгийн газар биш гэдгийг нотлон харуулж байна. Хэдийгээр “Шударга ёс” эсвэл Засгийн газарт хамтран ажиллах шийдвэр гаргаж байгаа боловч би Оюутолгойн асуудлаар сөрөг хүчний байр суурийг хамгаална” гэв.