Сүүлийн жилүүдэд бөө гэх эрдэм чадалтай хүмүүс борооны дараах мөөг мэт олширсон.

Бөө нар ч үйлчлүүлэгч ихтэй байдаг болж. Энэ нь их ашигтай бизнес үү. Эсвэл мөнх тэнгэрээс Монгол Улсыг маань ивээгээд ийм олон ид шидтэн хайрласан уу бүү мэд. Зарим нь ч тэнгэрээс мориор ирээд хорт хавдартай хүнийг анагаасан гээд хамаг хөрөнгийг нь аваад оддог. Түүнийх нь дараа нөгөө хүн өвчнөөр шаналсаар байгаад өнгөрдөг гэх мэт тохиолдол олон бий. Энэ нь эмчилчихээд байхад гам бариагүйгээс л болсон байх. Сүүлдээ урлаг соёлынхноос авахуулаад олны танил хүмүүс бөө болох нь шинэ бренд мэт дэлгэрсэн.

Цахим хуудсаар аялаж байтал манай улсад 24 мянган бөө байгаа талаар бичсэн байна. Энэ нь насаараа ном үзсэн эрдэмтэн мэргэдээс дөрөв дахин их тоо гэнэ. Ямар ч байсан ийм тооны ид шидтэн байгаа юм чинь Монгол удахгүй дэлхийд тэргүүлэх улс болох нь гарцаагүй. Наян настай байтугай учраа мэдэхгүй нялхсыг хүртэл бөө болохгүй бол амь насанд чинь аюул учирна гэж сүрдүүлээд бөө болгочихож байгаа юм. Зарим нэг нь би тэнгэр заяатай хэмээгээд хэдэн сая төгрөгөөр бөө нэрийг шавьдаа өгдөг. Багш гээчид хэдэн сая төгрөг өгөөд л нисдэг, далдыг хардаг, хүн хараадаг, анагаадаг ид шидтэн болчихдог. Энэ мэтээр хосгүй чадалтан нэмэгдсээр байхад Монгол хөгжихгүй байхын аргагүй.

Ер нь эмч, цагдаа, шүүхийн хэрэг алга. Бөө бүгдийг чаддаг юм чинь мэргэжил эзэмшинэ гэж өөрсдийгөө зовоож байхаар эртхэн насны залууд бөө болчихвол амьдрахад хялбар, нэг ядарсан хүнд засал хийгээд бидний сарын цалинг хялбар олчихно. Тэнгэр заяат бөө хэмээх хүнийг тэнгэрээс аяндаа амьдарлыг нь хүртэл зохицуулчихна. Ер нь УИХ гишүүд, энэ олон сайд, дарга нарын хэрэг ч байна уу. Тэд ч бас хосгүй чадалтай гэх бөө дээр очин дараачийн сонгуулиар ялах үгүйгээ үзүүлдэг болсон. Бидний замыг заадаг төрийн томчууд хүртэл бөөгөөр замаа заалгаж байхад бөөгөө л үүнээс ч олон болгочихсон байхад сайн сайхан өөрөө ирэх нь дамжиггүй.

Д.МЯГМАРДОРЖ