УОК-ын хэвлэлийн төлөөлөгч Ц.Ганзориг “Улсын хил дотор халдварын батлагдсан 22 тохиолдол байна. Улаанбаатар болон Сэлэнгэд голомт гараад байгаа” гэлээ.

ХӨСҮТ-ийн тандалт судалгааны албаны дарга А.Амбасэлмаа “2020 оны 11 дүгээр сарын 10-наас хойш Улаанбаатар болон Сэлэнгэ аймагт халдварын багц өвчин гарсан. Улаанбаатар хотод бүртгэгдсэн анхны тохиолдлын ойрын хавьтал болох 445 хүнийг илрүүлж, 100 хувь шинжилгээнд хамруулсан.

Хоёр удаагийн давтан шинжилгээнд 100 гаруй, гурван удаагийн давтан шинжилгээнд 30 гаруй хүнийг хамрууллаа. Улаанбаатар хотын багц өвчний хүрээн дэхь халдвар авсан хүний тоо 10 байгаа юм. Үүнтэй зэрэгцээд Сэлэнгэ аймагт халдварын голомт гарч батлагдсан тохиолдол дөрөв байна. Энэ нь Улаанбаатар хоттой хамаагүй.

Сэлэнгэ, Дарханы төмөр замын урсгалыг дагасан халдварын тохиолдол Улаанбаатар гээд манай улсад хоёр хэсэг багц тохиолдол бүртгэгдсэн. Улаанбаатар хотын багц өвчний ойрын хавьтлуудыг шинжилгээнд хамруулж, хүрээг цомхотгож, хяналтдаа аваад байна.” гэв.