Э.Бат-Үүлийн хүү “Грандлайн” компанийн захирал асан Б.Чулуудай, Турк улсын “216 Яапи Үрэти Худалдаа” компанитай хамтран гэр хорооллын дахин төлөвлөлтийн хүрээнд БЗД-т “Түмэн-Амгалан” цогцолборыг барихаар болсон байдаг. Гэвч үйл ажиллагааны явцад мөнгөний асуудал гарсан тул хоёр талын удирдлагууд зөрчилдөж, шүүхэд хандах дээрээ тулсан байдаг.

Учир нь Б.Чулуудай Турк талын хувьцаа эзэмшигчдэд мэдэгдэхгүйгээр, гэрээг зөрчиж Улаанбаатар банкнаас есөн тэрбум төгрөгийн зээл авчээ. Мөн Нийслэлийн хөрөнгө оруулалтын газраас 11 тэрбум гаруй төгрөгийн инженерийн шугам сүлжээний дэд бүтцийн ажил авсан аж. Тиймээс Түркийн тал уг асуудлаар иргэний шүүхэд хандсан байна. Харин Б.Чулуудай гэ­рээг цуцлуулахаар Арбитрын шүүхэд өргөдөл гаргасан аж.

Иймээс Монголын олон улсын ба үндэсний арбитрийн шүүхээс энэ оны гуравдугаар сарын 26-ны өдөр 47 дугаартай шийдвэр гарч “Грандлайн” компани, Турк улсын “216 Яапи Үрэти Худалдаа” компанийн хооронд байгуулсан хамт­ран ажиллах гэрээг цуцалсан байна. Түүнчлэн Турк талаас Б.Чулуудайн нэхэмжилсэн 762.0 сая төгрөгийнхөө 562.0 сая төгрөгийг нэхэмжлэхээс татгалзсаныг хүлээн авч, 50 хувийн хувьцааг буцаахыг даалгаж, “Грандлайн” компанийн хувьцаа эзэмшигч Б. Чулуу­дайгаас Турк улсын “216 Яапи Үрэтий ху­далдаа” компанид 827.27.51 ам.доллар, 31.9 сая төгрөг гаргуулж олгуулахаар шийдвэрлэсэн байжээ. Гэтэл Б.Чулуудай туркуудад өнөөг хүртэл нэг ч төгрөг төлөөгүй байгаа юм байна. Тиймээс Түркийн тал энэ талаар хөөцөлдсөөр яваа аж.

Талууд “Хамтран ажиллах гэрээ”-г 2013 оны арванхоёрдугаар сарын 16-ны өдөр бай­гуулс­наас хойш 2014 оны наймдугаар сар хүр­тэлх бүхий л үйл ажил­лагаанд Б.Чулуудайг гүй­цэтгэх захирал гэж үзэн хамтран ажиллаж байжээ. Гэхдээ “Грандлайн” компа­нийн хувьцаа эзэм­шигч Б.Чулуудай нь компа­нийн тухай Монгол Улсын хуулийн, 83.1, 83.6, Монгол-Туркын хамтарсан “Грандлайн” компанийг байгуулах тухай гэрээний 6.13, 10.1-д заасныг тус тус зөрчсөн юм байна.

Н.Чимэг