Иргэдийн сонголтыг өвөртөлж УИХ-д суучихаад тэдэн рүүгээ хялайж ч хардаггүй нөхдүүд одоогийн парламентад хэд хэдээрээ суудал бөглөж байна. Ялангуяа хөдөөнөөс сонгогдсон зарим нөхдүүд ахиж сонгогдохгүй юм шиг аашилдаг аж. Нэг удаа Ц.Нямдорж “Би Увсаас дахиж нэр дэвшихгүй, хотод Туулын эрэг дээр пиводож байгаад л аль нэг дүүргээс нь сонгогдчихно” гэж томроод нутагтаа очих нүүргүй болж билээ. Түүний нэгэн адилаар Женко Х.Баттулгын далбаан дор Баянхонгороос сонгогдсон УИХ-ын гишүүн Д.Ганбат нутгийнхандаа хударгагүй зан гаргаж яваа аж.

Саяхны нэгэн өдөр түүнийг сум орон нутгаас төрж гарсан төрийн өндөр албан тушаалтан хэмээгээд нутгийнх нь залуус шинэ жилийнхээ цэнгүүнд урьжээ. Тэдний зүгээс нутгаас сонгогдсон гишүүнээсээ элдвийг нэхэж сандаргаагүй зүгээр л хүрэлцэн ирэх хүндэтгэлийн урилга явуулжээ. Гэтэл мань хүний зүгээс юман чинээ авч үзэлгүй ямар ч хариу өгөлгүй таг чиг болсон гэнэ. Ийнхүү Баянхонгорын шинэ жил ганц түүнээр дуталгүй сайхан болж өнгөрсөн ч ирсэн зочид Д.Ганбатыг “нутгаа гэсэн сэтгэлгүй, хуншгүй нөхөр юм даа” гэцгээж байжээ.

Ер нь дан ганц Д.Ганбат ч гэлтгүй жаахан хөлжөөд, албан тушаалд хүрээд ирэхээрээ төрж өссөн нутгаа, түмэн олноо мартдаг эрхмүүд энэ төрд олон байдаг. Ялангуяа УИХ-д суучихаад эргэж харахгүй л явах гээд байдаг муу чанартай. Дөрвөн жил зугтаж зугтаж сонгууль ойртохоор шилээ маажаад, худлаа амлаад очно доо цаадуул чинь. Ямартай ч Д.Ганбат гишүүнийг дараа очиход нь Хонгор нутгийн түмэн “уучлаарай” гээд буцаах бололтой.

А.Төмөрсүх